Psalm 140
Vers 1
O HERE, verlos my van die man
wat heil soek in geweld en kwaad,
wat sy hart en hand laat samespan
tot stryd en Goddelose daad.
Vers 2
Hulle maak hul tong skerp soos 'n slang,
vol gif van adders is hul mond.
Help my, dat die manne my nie vang
wat my wil neerwerp teen die grond.
Vers 3
Die trotsaard loer al reeds op my gang:
digby my voet, daar lê sy net!
Ek móét daarin en ek word gevang
as U, o God, dit nie belet.
Vers 4
Ek het toe tot die HERE gespreek:
U is my God, wat my verhoor.
Ag, luister tog dan wanneer ek smeek,
en neig tot my geroep u oor!
Vers 5
O HERE, in wie my heil sy stut,
my lewe sy gewisheid het –
U is wat my hoof altyd beskut
en in die stryd my val belet.
Vers 6
Laat dit die bose nooit nie geluk,
maar stuit sy hand voor hy my tref
en verhinder tog sy gruwelstuk,
sodat hy hom nie trots verhef.
Vers 7
Die aanstigters van die leuenwerk,
wat steun op lis en slinkse taal –
mag vergelding, wat is vol en sterk,
nou op hul hoofde neer kom daal.
Vers 8
Werp vurige kole op hul af,
laat vlamme om hul lende slaan;
'n diepe kuil – maak dit hulle graf
waaruit hul nooit weer op sal staan!
Vers 9
Kwaad en trouelose nietigheid
van leuenaars hou nimmer stand;
geweldenaars het maar korte tyd
en onheil jaag die dwingeland.
Vers 10
Die HERE sal, dit is wat ek weet,
die regsaak van die arme rig;
in druk sal Hy hom nooit nie vergeet,
maar hom die lydenslas verlig.
Vers 11
Sekerlik, regverdiges sal, vry
van smaad, U loof op hoë toon,
opregtes sal nie meer onreg ly,
maar veilig voor u aanskyn woon.
.png){kind=icon}
iPsalm